A fin de semana cultural comezará o venres 8 de agosto, na Praza do Pendón, a carón do esteiro do Anllóns e na marxe da Senda fluvial. Alí, o grupo de teatro de rúa Os Quinquilláns representará a obra No fondo do mar.
Para o seguinte día, o sábado 9 de agosto, a oferta trasladarase á renovada praza de Neaño na que o grupo Mamá Cabra ofrecerá un concerto de música infantil na Noite dos nenos/as.
A fin de semana rematará cun percorrido nocturno por Borneiro coa Noite das estrelas na que se contará coa asesoría do científico baiés Jorge Mira, rostro coñecido da TVG por ser o presentador do programa Cifras e Letras. O asesoramento en patrimonio e lendas da zona corresponderá ó historiador Ángel Eiroa que neste mes de agosto non para de recibir visitas como guía do dolmen de Dombate. O lugar de saída será o aparcadoiro do castro A Cidá. Prégase ós asistentes a máxima puntualidade por ser esta actividade en domingo. Ademais, aconséllase levar lanterna, ademais de roupa e calzado cómodo.
Por outra banda, todas as familias cabanesas que o desexen poderán degustar as súas merendas nas mesas gratuítas patrocinadas polo concello de Cabana de Bergantiños. Desta maneira, o Concello de Cabana de Bergantiños e a comisión organizadora da romaría queren darlle pulo ás merendas baixo a sombra dos bidueiros que tanta tradición tivo ó longo do século XX. A solicitude de mesas poderase realizar no teléfono 670 878 441.
Ademais, seguindo o testemuño achegado polo crego Saturnino Cuíñas Lois, as merendas estarán animadas por un amplo número de cuartetos e grupos de gaitas do país. Durante todo o día, animará a charanga Os Celtas de Negreira. Pola tarde, a charanga será acompañada polo Cuarteto Donaire, polo Cuarteto O Hórreo, por Ruote, polos Gaiteiros de Anos e polo dúo de acordeóns Quen (Mos) Queira + Ramón de Cances.
O programa artéllase en catro direccións. No apartado de concellos saudables realizaranse rutas e camiñadas pola senda do Anllóns e por Borneiro. Ademais de gozar do entorno, os asistentes degustarán merendas saudables.
No apartado de campamentos, propóñense saídas ó Campamento Deportivo Calvo Sotelo da Deputación da Coruña, ó Campus de Fútbol da Torre e Acea da Ama ou ó Campamento Costa Bergantiñá. Ademais, no Pavillón Polideportivo, na Piscina Municipal e nas praias desenvolverase a Semana Saudable con Cabana Multideporte. Nos campamentos poderán participar nenos e nenas desde os 5 ata os 16 anos.
No apartado de programación continuada, no ximnasio municipal ofértase un Curso de Baile Latino e de Step + Body Tonic dirixidos a todas as idades. No apartado de saídas, os nenos acudirán ó circuíto de kárting de Ordes ou a Golpegolf de Baldaio.
Inscricións: Oficina de Deportes ou 981 754 020 / 678 530 368.
No noso afán por achegar a administración aos cidadáns e cidadás de Cabana e facilitar certos trámites administrativos que ata o de agora conlevaban realizar incómodos desprazamentos, lanzamos unha nova iniciativa.
Xa dispoñemos dun punto de información do Servizo Galego de Colocación (S.G.C.), dende onde todos e todas podedes renovar as vosas demandas de emprego, sen necesidade de acudir á oficina de Carballo.
Tamén é posible consultar as ofertas do S.G.C. e acceder ás páxinas web dos diferentes Servizos Públicos de Emprego Nacionais e Autonómicos.
É sabido que a cultura cabanesa amosou dende hai séculos unha abraiante riqueza. Se vostede visita a nosa sección de Persoeiros poderá achegarse á traxectoria de moitos dos creadores e artistas do noso Municipio.
O famoso músico popular Eduardo Vázquez Espasandín, o cesteiro Emilio Lema Pérez, o regueifeiro Fermín da Feira Nova ou a poetisa popular María Baña son algúns dos protagonistas que atopará neste novo apartado.
Na nosa nova web incorporamos unha impresionante visita virtual aos lugares máis significativos da nosa terra.
