Os actos comezaron ás 12.30 h coa celebración dunha misa solemne oficiada por Manuel Espiña Gamallo, quen na homilía disertou sobre a figura do homenaxeado. A misa foi cantada pola Coral de Bergantiños baixo a dirección do crego Manuel Rodríguez.
Tras a celebración relixiosa, procedeuse ó descubrimento dunha placa conmemorativa con letras de bronce na fachada da ermida de San Fins, que se conserva na actualidade e que contén o seguinte texto: “O pobo de Cabana ao seu fillo predilecto, D. Saturnino Cuíñas Lois”. De par do texto, aparece a figura simbólica de Cuíñas na que se observa un crego con barrete.
Os actos da mañá finalizaron cunha nova intervención da Coral de Bergantiños, cun recital poético a cargo do carballés Andrés Rei e a actuación dos Gaiteiros de Neaño.
Ás seis da tarde retomáronse os actos de homenaxe. Polo palco de cemento do campo da romaría foron subindo os seguintes artistas e agrupacións. As corais ‘Toxos e Flores’ de Ferrol, ‘Follas Novas’, ‘Lembranza’ e ‘Cántigas da Terra’ da Coruña. O grupo folk ‘Marea Baixa’ de Carballo. O grupo folclórico da Asociación Cultural ‘Río Anllóns’ de Ponteceso. O humorista ‘Carlos O Xestal’. Debutou como vocalista o cantautor carballés ‘Xosé Manuel Eirís’ que tocou unha zanfona pertencente a Cuíñas. A intervención do grupo de gaitas infantil ‘Os Zoquiños’ pertencentes ó Colexio As Revoltas de Cabana. Como fin de homenaxe, ‘Andrés Rei’ dirixiu o Berro Seco lanzado ó aire por todos os asistentes.
Unha noite no muíño engalanará as vésperas das Festas do Carme o vindeiro venres 22 de agosto no Campo da Festa de Canduas a partir das oito da tarde. Os actos iniciaranse cunha ruta de sendeirismo polo Rego dos Muíños coa asesoría do historiador Ángel Eiroa. A continuación, poñerase a traballar o muíño do Ferreiro para que os asistentes observen o funcionamento integral dun muíño de regato. E, por último, enriba do palco terá lugar un concerto festivo a cargo do grupo santiagués Festicultores.
O apartado gastronómico do evento contará cunhas 500 racións de empanada de millo con berberechos e empanada de millo con mexillóns. Ademais, realizaranse proxeccións continuadas de fotografías antigas e de patrimonio da parroquia de Canduas.
Unha noite no muíño está coorganizado polo Concello de Cabana de Bergantiños e a Comisión das Festas do Carme 08.
Un dos pratos fortes da noite foi a celebración dunha feira de artesanía con produtos de inspiración medieval. A ela acudiron artesáns artesáns locais e foráneos. Estiveron representados os oficios dos carpinteiros, zoqueiros, zapateiros, cesteiros, xaboeiros ou ceramistas. Nos 17 stands púidose observar o ferrador de cabalos Ángel de Tella (Ponteceso), os cesteiros Jaime Nantón de Canduas e Manuel Castro de Riobó, o zoqueiro Ramón Varela da Mata, o zapateiro Pepe de Velo de Barizo, o colareira Vanesa da Aldea de Corme, a coireira Margarita Díaz de Madrid, a decoradora de camisetas Sonia Ramallo da Coruña, a decoradora de velas e xabróns artesanais Anxos Orgueira da Coruña, o pintor de pratos de barro de Buño Miguel A. Calvo de Cances e a xaponesa Fumie Kitahori asentada en Riobó e que, ademais de poñer a nota exótica á feira, realizou demostracións de ‘origami’ (figuras xaponesas de papel). Grupos de veciños de Riobó colaboraron na elaboración de abalorios.
Os nenos e nenas riron coa intervención de Fredi Muíño que se disfrazou para esta ocasión de bufón mediefal ou cos agarimos da zancuda Raquel de Vigo que percorreu desde a altura todos os espazos da festa. De todos modos, a actividade máis demandada polos máis novos foron os paseos a cabalo polos arredores do lugar.
O apartado gastronómico tamén foi tremendamente solicitado xa que ás once da noite o público asistente dera boa conta de varias potas de callos e do resto de comida tradicional composta a base de bolos do lar, bolos do pote, cachelos, carne á grella, chulas ou filloas que elaboraran os compoñentes da A.VV. San Martiño.
A música veu da man do dúo de zanfonas Ancestral e a murga de Meaño (Pontevedra) Brisas do Mar que ofreceu un repertorio danzable ata ben entrada a noite.
Unha noite de medievo foi organizado polo concello de Cabana de Bergantiños e a Asociación de Veciños San Martiño de Riobó e contou coa colaboración de todas as casas do lugar.
As actividades desenvolvéronse de 10.00 a 14.00 h da mañá pola monitora Ana Amenedo da empresa Breogán de Xestión. Desenvolvéronse talleres de coeducación, xogos tradicionais como a corda ou a pita, habilidades sociais en xogos de roles ou emocións e tamén proxeccións de películas.
Os espazos empregados para o desenvolvemento deste programa coeducativo e de animación foron a Casa da Cultura, o Pavillón Polideportivo Municipal en días de mal tempo, no Auditorio Municipal, o patio do CPR As Revoltas e os espazos públicos da Senda Fluvial do Anllóns.
Este Programa Meniñeiro convocouse desde o departamento de Servizos Sociais do concello de Cabana de Bergantiños e estivo subvencionado pola consellería de Vicepresidencia da Igualdade e do Benestar dentro do programa de Educación Famliar.
A fin de semana cultural comezará o venres 8 de agosto, na Praza do Pendón, a carón do esteiro do Anllóns e na marxe da Senda fluvial. Alí, o grupo de teatro de rúa Os Quinquilláns representará a obra No fondo do mar.
Para o seguinte día, o sábado 9 de agosto, a oferta trasladarase á renovada praza de Neaño na que o grupo Mamá Cabra ofrecerá un concerto de música infantil na Noite dos nenos/as.
A fin de semana rematará cun percorrido nocturno por Borneiro coa Noite das estrelas na que se contará coa asesoría do científico baiés Jorge Mira, rostro coñecido da TVG por ser o presentador do programa Cifras e Letras. O asesoramento en patrimonio e lendas da zona corresponderá ó historiador Ángel Eiroa que neste mes de agosto non para de recibir visitas como guía do dolmen de Dombate. O lugar de saída será o aparcadoiro do castro A Cidá. Prégase ós asistentes a máxima puntualidade por ser esta actividade en domingo. Ademais, aconséllase levar lanterna, ademais de roupa e calzado cómodo.
O programa artéllase en catro direccións. No apartado de concellos saudables realizaranse rutas e camiñadas pola senda do Anllóns e por Borneiro. Ademais de gozar do entorno, os asistentes degustarán merendas saudables.
No apartado de campamentos, propóñense saídas ó Campamento Deportivo Calvo Sotelo da Deputación da Coruña, ó Campus de Fútbol da Torre e Acea da Ama ou ó Campamento Costa Bergantiñá. Ademais, no Pavillón Polideportivo, na Piscina Municipal e nas praias desenvolverase a Semana Saudable con Cabana Multideporte. Nos campamentos poderán participar nenos e nenas desde os 5 ata os 16 anos.
No apartado de programación continuada, no ximnasio municipal ofértase un Curso de Baile Latino e de Step + Body Tonic dirixidos a todas as idades. No apartado de saídas, os nenos acudirán ó circuíto de kárting de Ordes ou a Golpegolf de Baldaio.
Inscricións: Oficina de Deportes ou 981 754 020 / 678 530 368.
No noso afán por achegar a administración aos cidadáns e cidadás de Cabana e facilitar certos trámites administrativos que ata o de agora conlevaban realizar incómodos desprazamentos, lanzamos unha nova iniciativa.
Xa dispoñemos dun punto de información do Servizo Galego de Colocación (S.G.C.), dende onde todos e todas podedes renovar as vosas demandas de emprego, sen necesidade de acudir á oficina de Carballo.
Tamén é posible consultar as ofertas do S.G.C. e acceder ás páxinas web dos diferentes Servizos Públicos de Emprego Nacionais e Autonómicos.
